भोपाळ,दि.९: ‘ब्राह्मण आणि व्यापारी मतदार माझ्या खिशात’ असे वक्तव्य भारतीय जनता पार्टीच्या नेत्यानं केलं आहे. सोमवारी झालेल्या एका पत्रकार परिषदेत पत्रकारांच्या प्रश्नाला उत्तर देताना आपल्या कुर्त्याच्या खिशाकडे इशारा करत ‘ब्राम्हण आणि बनिया तर माझ्या खिशात आहेत’ असं वक्तव्य भाजप नेते पी मुरलीधर राव यांनी केलं होतं. मध्य प्रदेशातील भारतीय जनता पक्षाचे प्रभारी पी मुरलीधर राव आपल्या वक्तव्यासाठी अनेकदा चर्चेत असतात. काही दिवसांपूर्वीच आपल्याच पक्षातील नेत्यांना त्यांनी ‘नालायक’ म्हटलं होतं. आता त्यांनी आणखीन एक वादग्रस्त वक्तव्य केलंय.
‘भाजपला ब्राम्हण आणि बनिया (व्यापारी) राजकीय पक्ष म्हटलं आणि आता भाजपमधून एससी-एसटी वर्गावर लक्ष देणार असल्याचं म्हटलं जातं. परंतु, भाजपची घोषणा मात्र ‘सबका साथ, सबका विकास’ आहे. भाजप जातीच्या आधारावर मतदारांना सामोरं जाणार का?’ असा प्रश्न काही पत्रकारांनी राव यांना सोमवारी झालेल्या एका पत्रकार परिषदेत विचारला होता.
वादग्रस्त वक्तव्य
प्रश्नाला उत्तर देताना पी मुरलीधर राव यांनी आपल्या कुर्त्याच्या खिशाकडे इशारा करत ‘ब्राम्हण आणि बनिया तर माझ्या खिशात आहेत… तुम्ही आम्हाला ब्राम्हण आणि बनिया पक्षा म्हटलं, जेव्हा याच वर्गातून अधिक कार्यकर्ते आणि मतदार पक्षात होते. आम्ही एससी-एसटी वर्गाच्या लोकांना जोडण्याचं काम करत आहोत कारण त्यांचं प्रतिनिधित्व कमी आहे. परंतु, भाजप ब्राह्मण आणि व्यापाऱ्यांसहीत कोणत्याही वर्गाला सोडणार नाही. ज्यांनी अनेक गोष्टींत मागे सोडण्यात आलं होतं त्यांना आपल्या पक्षात सहभागी करून घ्यायचा भाजपचा प्रयत्न आहे’, असं वक्तव्य राव यांनी केलं होतं.
भाजप सरकार अनुसूचित जाती आणि जमातींकडे ‘व्होटबँक’ म्हणून पाहत नाही. तर त्यांचं मागासलेपण, रोजगार आणि शिक्षण यांसारख्या मुलभूत गरजा पूर्ण करण्यावर विशेष लक्ष देत आहे, असा दावा राव यांनी केला.
काँग्रेसनं उचलून धरला मुद्दा
मात्र यानंतर विरोधी पक्ष काँग्रेसकडून राव यांच्यावर सडकून टीका करण्यात आलीय. काँग्रेसनं राव आणि भाजपकडे माफीची मागणी केलीय. ‘ब्राम्हण आणि बनिया आपल्या खिशात असल्याचं सांगत भाजपच्या प्रभारींना या वर्गाचा घोर अपमान’ केल्याची टीकाही माजी मुख्यमंत्री कमलनाथ यांनी केलीय.
मात्र, यानंतर विरोधी पक्षाकडून आपलं वक्तव्य चुकीच्या पद्धतीनं सादर केलं जात असल्याचा सांगत राव यांनी या वादावर पडदा टाकण्याचा प्रयत्न केलाय.
