पुणे,दि.१९: भाजपा-मनसे या पक्षाची जवळीक वाढत चालली आहे. यामुळे भाजपा मनसे युती होणार असल्याची चर्चा सुरू आहे. केंद्रीय सामाजिक न्याय राज्यमंत्री रामदास आठवले (Ramdas Athawale) यांनी आज पुण्यात घेतलेल्या पत्रकार परिषदेत संभाव्य भाजप-मनसे युतीसह विविध मुद्द्यांवर भाष्य केले.
भाजपा आणि मनसे येत्या काळात हे दोन्ही पक्ष महाराष्ट्रात युती करतील अशी शक्यता दिसत आहे. अशावेळी भाजपचा मित्रपक्ष असलेल्या रिपाइंचे अध्यक्ष आणि केंद्रीय सामाजिक न्याय राज्यमंत्री रामदास आठवले यांनी मात्र या युतीला स्पष्ट शब्दांत विरोध केला आहे. रामदास आठवले यांची आज पुणे येथे पत्रकार परिषद झाली. यावेळी भाजप आणि मनसे यांच्यातील संभाव्य युतीबाबत विचारले असता आठवले यांनी थेट शब्दांत आपले मत मांडले.
भाजपने मनसे अध्यक्ष राज ठाकरे यांच्या नादाला लागू नये आणि मनसेसोबत युती करू नये असे मला वाटते, असे आठवले यांनी सांगितले व या युतीला कडाडून विरोध केला. माजी मुख्यमंत्री देवेंद्र फडणवीस यांनी नवी मुंबईतील एका कार्यक्रमात ‘आजही मला मुख्यमंत्री असल्यासारखं वाटतं’, असे विधान केले होते. या विधानावरून महाविकास आघाडीतील नेत्यांनी चांगलेच तोंडसुख घेतले. याबाबत आठवले यांना विचारले असता त्यांनी आपल्या खास शैलीत उत्तर दिले. देवेंद्र फडणवीस यांना वाटते की ते मुख्यमंत्री आहेत, तर उद्धव ठाकरे यांना वाटते ते मुख्यमंत्री नाहीत, असा सगळा प्रकार आहे, असे आठवले म्हणाले.
केंद्र सरकारकडून सीबीआय आणि ईडीचा वापर करून कारवाई करण्यात येत असल्याचे वक्तव्य माजी केंद्रीय मंत्री शरद पवार यांनी केले आहे. यावर आठवले म्हणाले,’ पवार यांच्या मताशी मी सहमत नाही. ते देशाचे माजी कृषिमंत्री आणि माजी संरक्षण मंत्री आहेत. सीबीआय आणि ईडीचे कामकाज कसे चालते, हे त्यांना माहीत आहे.’ भाजपला राज्यातील सरकार पाडण्याची गरज नाही. हे सरकार पाडायचे असते तर एक वर्षापूर्वीच पाडले गेले असते. राज्यात तिन्ही पक्षांचे बहुमत आहे. त्यामुळे त्यांनी सरकार चालवावे इतकेच मी सांगेन, असे आठवले एका प्रश्नावर म्हणाले.
भारत विरुद्ध पाकिस्तान सामन्याला विरोध
जम्मू-काश्मीरमध्ये दहशतवाद्यांकडून मजुरांवर अत्याचार करण्यात येत आहेत. पाकिस्तानकडून दहशतवाद्यांना मदत करण्यात येत असल्याने पुन्हा एकदा पाकिस्तानविरुद्ध सर्जिकल स्ट्राइक करावा लागणार आहे, असे रामदास आठवले म्हणाले. देशामध्ये जातनिहाय जनगणना करायला हवी. जातनिहाय जनगणनेमुळे जातीयवाद वाढतो, हे म्हणणे चुकीचे आहे. अनुसूचित जाती आणि अनुसूचित जमातींबरोबरच इतर मागासवर्गीयांची जातनिहाय जनगणना करण्यात यावी, अशी मागणी आठवले यांनी केली. टी २० वर्ल्ड कपमध्ये भारत विरुद्ध पाकिस्तान क्रिकेट मॅच होऊ नये, अशी आमच्या पक्षाची भूमिका असल्याचेही आठवले म्हणाले.
