मुंबई,दि.29: बांगलादेशातील प्रमुख विरोधी पक्षाच्या नेत्यांकडून चालवण्यात येत असलेल्या भारतविरोधी मोहिमेदरम्यान शेख हसीना सरकार भारतातून 50 हजार टन कांदा आयात करणार आहे. हसीना सरकारच्या आर्थिक घडामोडींच्या मंत्रिमंडळ समितीने बुधवारी यासंदर्भातील वाणिज्य मंत्रालयाच्या प्रस्तावाला मंजुरी दिली. अर्थमंत्री अबुल हसन अली यांच्या अध्यक्षतेखाली ही बैठक झाली.
शेख हसीना सरकारचे हे पाऊलही महत्त्वाचे ठरते कारण बांगलादेशातील प्रमुख विरोधी पक्ष बीएनपी आणि त्यांच्या मित्रपक्षांचे नेते तेथील भारताचा प्रभाव संपवण्यासाठी ‘इंडिया आउट कॅम्पेन’ चालवत आहेत. याअंतर्गत ते बांगलादेशातील भारतीय वस्तूंवर बहिष्कार टाकण्याचे आवाहन करत आहेत.
अलीकडेच BNP नेते रुहुल कबीर रिझवी यांनी काश्मिरी शाल जाळली होती. ज्यानंतर बांगलादेशच्या पंतप्रधान शेख हसीना यांनी निशाणा साधला होता आणि म्हटले होते की ते भारतीय मसाल्याशिवाय अन्न खाऊ शकतात का?
शेख हसीना असेही म्हणाल्या की जेव्हा ते (विरोधी पक्षाचे नेते) त्यांच्या पक्षाच्या कार्यालयासमोर त्यांच्या पत्नींच्या भारतीय साड्या जाळतील तेव्हाच हे सिद्ध होईल की ते खरोखरच भारतीय उत्पादनांवर बहिष्कार घालण्यास कटिबद्ध आहेत.
बांगलादेशच्या न्यूज वेबसाइटनुसार, वाणिज्य मंत्रालयाची सरकारी संस्था, ट्रेडिंग कॉर्पोरेशन ऑफ बांग्लादेश जी-टू-जी तत्त्वावर भारताच्या नॅशनल कोऑपरेटिव्ह एक्सपोर्ट्स लिमिटेडकडून कांदा आयात करेल. मात्र, कांद्याचे भाव काय असतील याचा खुलासा अद्याप झालेला नाही. मंत्रिमंडळ विभागाचे अतिरिक्त सचिव सांगतात की, भारतातून कांदा आयातीला मंजुरी दिल्यानंतर हा प्रस्ताव कॅबिनेट समितीकडे पाठवला जाईल. त्यावेळी कांद्याचे दर उघड होऊ शकतात.
रमजान आणि ईदपूर्वी कांदा निर्यातीला परवानगी
भारताने कांदा निर्यातीवर बंदी घातली आहे. मात्र बांगलादेश आणि यूएईला सूट देत रमजान आणि ईदपूर्वी कांदा निर्यातीला परवानगी देण्यात आली आहे.
बांगलादेशातील विरोधी पक्षनेते भारतावर आरोप करतात की भारत बांगलादेशातील लोकांना समर्थन देत नाही तर शेख हसीना यांचा पक्ष बांगलादेश अवामी लीगला समर्थन देत आहे. यामुळेच बांगलादेशातील काही विरोधी नेते ‘इंडिया आऊट’ मोहीम चालवत आहेत आणि भारतीय उत्पादनांवर बहिष्कार टाकून संताप व्यक्त करत आहेत.
भारत सरकारच्या वाणिज्य मंत्रालयाच्या म्हणण्यानुसार, भारत सरकारने नॅशनल कोऑपरेटिव्ह एक्सपोर्ट्स लिमिटेडच्या माध्यमातून संयुक्त अरब अमिराती आणि बांगलादेशमध्ये 64 हजार टन कांदा निर्यात करण्यास परवानगी दिली आहे. बांगलादेशला 50 हजार टन कांदा निर्यात करण्याची परवानगी मिळाली आहे. त्याचबरोबर संयुक्त अरब अमिरातीमध्ये 14 हजार टन कांदा निर्यात करण्यास परवानगी देण्यात आली आहे.
डिरेक्टोरेट जनरल ऑफ कमर्शियल इंटेलिजन्स अँड स्टॅटिस्टिक्सच्या आकडेवारीनुसार, बांगलादेशने 2021-22 या वर्षात भारताकडून सर्वाधिक कांदा खरेदी केला आहे. भारताच्या एकूण कांद्याच्या निर्यातीपैकी 31.91 टक्के कांदा बांगलादेशला निर्यात झाला आहे.
भारतीय वस्तूंवर बहिष्कार का?
भारताच्या पाठिंब्यामुळेच बांगलादेशच्या एकतर्फी निवडणुका आणि शेख हसीना यांच्या सरकारला जागतिक मान्यता मिळाल्याचे बांगलादेशातील विरोधी पक्षांचे म्हणणे आहे. त्यामुळे ‘इंडिया आऊट’ मोहिमेद्वारे भारत आणि तेथील उत्पादनांवर बहिष्कार टाकला पाहिजे. बांगलादेशातील लोकांमध्ये अलीकडच्या काळात भारतविरोधी भावना वाढल्याचे विश्लेषकांचे म्हणणे आहे.
यामागचे कारण स्पष्ट करताना तज्ज्ञांचे म्हणणे आहे की, भारतीय जनता पक्षावर मुस्लीमविरोधी असल्याचा आरोप केला जातो, जो बांगलादेशातील मुस्लिमांच्या बरोबरीने चालत नाही. पण भारताला विरोध होण्याचे सर्वात मोठे कारण म्हणजे गेल्या 15 वर्षांपासून सत्तेत असलेल्या शेख हसीना यांच्या अवामी लीग या पक्षाला भारताने दिलेला पाठिंबा आहे. अवामी लीग 15 वर्षांपासून सत्तेत आहे, कारण त्यांना भारताचा पाठिंबा आहे, असे बीएनपीचे कार्यकर्ते सांगत आहेत.
