बुलडाणा,दि.१५ : संतप्त झालेल्या नागरिकांनी २ पिकअप ट्रक जाळल्याची घटना घडली आहे. पिकअपच्या चालकाला गावकऱ्यांनी मारहाणही केली आहे. खामगाव मेहकर मार्गावरील देऊळगाव साकरशा गावाजवळ मध्यरात्री काही नागरिकांना गायी घेऊन जाताना दोन पिकअप ट्रक दिसले. नागरिकांनी हे ट्रक थांबवून विचारपूस केली. या छोट्याशा ट्रकमधून २० ते २५ गायी कोंबून कोंबून भरल्याचे समोर आले. या ट्रकमधील ३ गायींचा मृत्यू झाल्याचं नागरिकांच्या निदर्शनास येताच नागरिक संतप्त झाले. त्यांनी ही माहिती गावातील काहींना दिली. यामुळे एक मोठा जमाव मध्यरात्री या ठिकाणी जमल्याने तणाव निर्माण झाला.
संतप्त जमावाने ट्रकमधील गायींना बाहेर काढले आणि ट्रक पेटवून दिला. या घटनेत ट्रक पूर्णपणे जळून खाक झाला. मात्र, या मार्गावर अनेक ठिकाणी पोलीस चेक पोस्ट असतानाही अवैधपणे गायी घेऊन जाणारा हा ट्रक आला कसा? हा प्रश्न उपस्थित होत आहे. या दोन्ही पिकअप ट्रकमध्ये एकूण ९ जण होते. त्यापैकी ६ जण अंधाराचा फायदा घेऊन पळून गेलेत. यानंतर संतप्त जमावाने दोन्ही वाहन चालकांना बेदम मारहाण केली.
