मुंबई,दि.२४: लाडकी बहीण योजनेबाबत महिला व बालविकास मंत्री आदिती तटकरे (Aditi Tatkare) यांनी मोठी घोषणा केली आहे. मुख्यमंत्री माझी लाडकी बहीण योजनेचे दर महिन्याला मिळणारे 1500 रूपये लाखो महिलांना मिळाले नाहीत. e-KYC केल्यानंतरही अनेक पात्र महिलांना या योजनेचा लाभ मिळत नाही. केवायसी प्रक्रिया करताना लाखो महिलांनी चुकीचा पर्याय निवडला असल्याने त्यांना पैसे मिळाले नसल्याचे सांगितले जात आहे.
लाखो महिलांना या योजना लाभ न मिळाला नाही, अशा महिलांना आता मोठा दिलासा मिळणार आहे. मंत्री आदिती तटकरे यांनी सोशल मिडीयावर (Xवर) पोस्ट करत याबाबत मोठी घोषणा केली आहे. लाभापासून वंचित राहिलेल्या महिलांना आता एका फोन कॅालवर शंकेचे निरसन करण्यात येणार आहे. ज्या महिलांना आवश्यकता असेल त्यांनी याचा लाभ घ्यावा असे आवाहन तटकरे यांनी केले आहे.
लाडकी बहिण योजनेबाबत शंकेचे निरसन करण्यासाठी 181 हा हेल्पलाईन नंबर जारी करण्यात आला आहे. या योजनेच्या अंतर्गत येणाऱ्या महिला 181 नंबर डायल करून माहिती घेऊ शकतात. असे तटकरे यांनी सोशल मीडियावरील पोस्टमध्ये म्हटले आहे.
लाडकी बहीण योजनेत केवायसीमध्ये माहिती चुकलेल्या महिलांची प्रत्यक्ष पडताळणी केली जाणार आहे. अंगणवाडी सेविका महिलांची पडताळणी करणार आहे. अनेक महिलांनी शासकीय नोकरदार असल्याचा पर्याय निवडला आहे. याची प्रत्यक्ष पडताळणी केली जाणार आहे. वस्तुस्थिती तपासून महिलांना ई केवायसीसाठी संधी दिली जाणार असल्याचे समजते.
आदिती तटकरे यांची पोस्ट
मुख्यमंत्री माझी लाडकी बहीण योजनेची e-KYC प्रक्रिया करत असताना काही कारणास्तव चुकीचा पर्याय निवडल्याने लाभ स्थगित झाल्याच्या काही तक्रारी विभागास प्राप्त झाल्या आहेत. या व योजनेशी संबंधित इतरही तक्रारींचे, शंकांचे फोन कॉलवर निवारण करण्यासाठी १८१ या महिला हेल्पलाइन नंबरवर मदत उपलब्ध करून देण्यात आली आहे. याबाबत संबंधित कॉल ऑपरेटर्सना योग्य ते प्रशिक्षणही देण्यात आले आहे. योजनेशी संबंधित सर्व तक्रारींचे व शंकांचे निरसन १८१ या हेल्पलाईन नंबरवरून करण्यात येणार आहे.
तरी, सर्व लाडक्या बहिणींनी आवश्यकता भासल्यास या सुविधेचा लाभ घ्यावा ही नम्र विनंती.
