सोलापूर,दि.२१: Aditi Tatkare On Ladakibahin Yojana | महाराष्ट्रात राज्य सरकार पात्र महिलांसाठी दरमहा १५०० रूपये मुख्यमंत्री लाडकी बहीण योजनेअंतर्गत देत आहे. मुख्यमंत्री लाडकी बहीण योजनेत पात्र महिलांना महिन्याला 1500 रूपये देण्यात येतात. राज्यातील विधानसभा निवडणुकीपूर्वी लाडकी बहीण योजनेत मिळणारी रक्कम 2100 रूपये केली जाईल असे जाहीरनाम्यात म्हटले होते. मात्र प्रत्यक्षात लाडकी बहीण योजनेतील रक्कम वाढवून देण्यात आली नाही.
या योजनेच्या निकषात न बसणारेही अनेकजण या योजनेचा लाभ घेत आहेत. ‘मुख्यमंत्री-माझी लाडकी बहीण’ या योजनेमध्ये पारदर्शकता येण्यासाठी व लाभार्थ्यांना नियमितपणे आर्थिक लाभ मिळावा याकरिता https://ladakibahin.maharashtra.gov.inया संकेतस्थळावर e-KYC ची सुविधा उपलब्ध करण्यात आली आहे. अशी माहिती महिला व बालविकास मंत्री आदिती तटकरे (Aditi Tatkare) यांनी दिली आहे.
काय म्हणाल्या आदिती तटकरे? | Aditi Tatkare On Ladakibahin Yojana
ही प्रक्रिया मोबाईलवरूनही सोप्या पद्धतीने करता येईल. पुढील दोन महिन्यात ही प्रक्रिया लाभार्थ्यांनी पूर्ण करण्याचे आवाहन महिला व बालविकास मंत्री आदिती तटकरे यांनी केले आहे. या प्रक्रियेमुळे भविष्यातील इतर शासकीय योजनांचा लाभ मिळवण्यासाठीही मदत होणार असल्याचे त्यांनी स्पष्ट केले.
राज्यातील महिलांच्या आर्थिक स्वातंत्र्यासाठी, त्यांच्या आरोग्य-पोषणात सुधारणा करण्यासाठी आणि कुटुंबातील त्यांची निर्णायक भूमिका मजबूत करण्यासाठी ‘मुख्यमंत्री-माझी लाडकी बहीण’ योजना राबवली जात आहे. या योजनेच्या माध्यमातून थेट लाभ हस्तांतरण (Direct Benefit Transfer) द्वारे आर्थिक सहाय्य दिले जाते.
महिला व बाल विकास विभागाकडून e-KYC माध्यमातून लाभार्थींचे आधार प्रमाणीकरण केले जाणार आहे. ही प्रक्रिया अतिशय सहज, सोपी व सुलभ असून, महिला स्वत:च्या मोबाईलवरूनही ही प्रक्रिया पूर्ण करू शकतील अशी प्रणाली विकसित करण्यात आली आहे. यासंदर्भात आर्थिक मागणी करीत असेल त्यास लाभार्थींनी बळी पडू नये असे आवाहनही आदिती तटकरे यांनी केले आहे.
