वर्धा,दि.१३: Accident: ट्रकच्या भीषण अपघातात ड्रायव्हरचा जागीच मृत्यू झाला तर क्लिनर गंभीर जखमी झाल्याची घटना घडली आहे. ओव्हरटेक करण्याच्या नादात भरधाव ट्रकने समोरुन येणाऱ्या ट्रकला धडक दिली. या भीषण अपघातात ट्रकचालकाचा जागीच मृत्यू झाला. तर क्लिनर गंभीर जखमी झाला. हा अपघात पुलगाव येथून १३ कि.मी अंतरावर असलेल्या केळापूर जवळ १२ रोजी शनिवारी रात्रीच्या सुमारास झाला.
रवी भास्कर जाधव (२६) रा. मेहेकर, जि. बुलढाणा असे मृतकाचे नाव असून क्लिनर प्रकाश सुखदेव लष्कर हा गंभीर जखमी झाल्याने त्याच्यावर सावंगी येथील रुग्णालयात उपचार सुरु आहे. मृतक रवी भास्कर जाधव हा ट्रकमध्ये द्राक्ष भरुन नागपूरकडे प्रचंड वेगात जात होता. दरम्यान समोरील वाहनाला ओव्हरटेक करत असतानाच नागपूरकडून पुलगावकडे जाणाऱ्या ट्रकला जबर धडक दिली. या अपघातात रवी भास्कर जाधव याचा जागीच मृत्यू झाला. तर प्रकाश लष्कर हा गंभीर जखमी झाला.
अपघात इतका भीषण होता की, ट्रकचा समोरील भाग पूर्णत: चक्काचूर होउन त्याचा आकारच बदलला होता. रात्रीच्या काळोखात अपघात झाल्याने काही वेळापर्यंत दोन्ही बाजूची वाहतूक ठप्प झाली होती. तसंच ज्या ट्रकला धडक दिली, त्या ट्रकमधील चालक अमोल घुगरे रा. अहमदनगर आणि क्लिनर शेख गफ्फार शेख रहीम यांना किरकोळ मार लागला असून त्यांच्या ट्रकचेही मोठे नुकसान झाले असल्याची माहिती पोलिसांनी दिली.
लोकांची द्राक्ष पळविण्यासाठी घाई
अपघातग्रस्त ट्रकमधील द्राक्षांचा सडा रस्त्याच्या कडेला पडला. रस्त्याच्या कडेला पडलेला सडा तसंच कॅरेटमधील द्राक्षावर लोकांच्या उड्या पडल्या. अपघातात ट्रकचालकाचा मृत्यू झाल्यापासून अनभिज्ञ नागरिकांनी द्राक्ष नेण्यासाठी गर्दी केली. काही नागरिक थैलीत तर काही रुमालात बांधून द्राक्ष नेत होते. रस्त्यावरुन कारने जाणाऱ्या अनेकांनीही वाहन थांबवत सोनं लुटतात तसे द्राक्ष लुटले.
