यवतमाळ,दि.३१: राजकीय वर्तुळातून एक अत्यंत धक्कादायक आणि थरारक प्रकार समोर आला आहे. केंद्र सरकारमध्ये थेट (Central Government Job Fraud) राज्यमंत्री दर्जाचे मानाचे पद मिळवून देण्याच्या बहाण्याने तब्बल २० ते २५ कोटी रुपयांची गंडा घालणारी एक आंतरराज्यीय दर्जाची टोळी सक्रिय असल्याचे उघड झाले आहे. मात्र, भाजपच्या एका चतुर नेत्याने वेळेवर दाखवलेले चातुर्य आणि रचलेल्या फिल्मी स्टाईल सापळ्यामुळे या महाठगांचा संपूर्ण पर्दाफाश झाला असून पोलिसांनी तिघांना बेड्या ठोकल्या आहेत.
पडद्यामागची कहाणी: दिल्लीची वट आणि ४२ महामंडळांची ‘ऑफर’
भाजपचे जिल्हा समन्वयक नितीन भुतडा यांना १६ मे रोजी लौकिक फुलकर नावाच्या व्यक्तीने मेसेज पाठवून जाळ्यात ओढण्याचा प्रयत्न केला. केंद्र सरकार अंतर्गत असणाऱ्या ४२ विविध महामंडळांची यादी भुतडा यांना पाठवण्यात आली आणि त्यापैकी आवडते महामंडळ निवडण्यास सांगितले गेले. (Political Posting Scam) “जितकी मोठी खुर्ची, तितकी मोठी किंमत” असा नियम सांगत ठगांनी भुतडा यांच्याकडे या कामासाठी तब्बल २० कोटी २५ लाख रुपयांची मागणी केली. धक्कादायक बाब म्हणजे, मध्यप्रदेशातील नेत्यांची आणि काँग्रेसमधून भाजपमध्ये आलेल्या बड्या चेहऱ्यांची बनावट नावे घेऊन, त्यांनी आधीच कोट्यवधी रुपये कसे मोजले आहेत, याची एक खोटी यादीच भुतडा यांच्यासमोर सादर करण्यात आली.
संशय बळावला अन् नेत्याने फिरवली ‘चक्रे’
सुरुवातीला या भूलथापांवर विश्वास ठेवून भुतडा यांनी ५० हजार रुपये दिले देखील होते. परंतु, “टोकन रक्कम थेट दिल्लीला पोहोचणार आणि तिथूनच नियुक्तीचा फोन येईल” या अतिशयोक्तीपूर्ण दाव्यांमुळे भुतडा यांच्या मनात संशयाची पाल चुकचुकली. काहीतरी मोठी गडबड आहे हे ओळखून त्यांनी पोलिसांशी संपर्क साधला आणि स्वत:च या टोळीचा गेम करण्याचे ठरवले. (Sting Operation by BJP Leader)
‘स्पाय कॅमेरा’ आणि रद्दीने भरलेली बॅग: असा रचला थरारक सापळा
माजी आमदार मदन येरावार यांच्या संपर्क कार्यालयात या व्यवहाराची पुढील बैठक ठरली. भुतडा यांनी त्या कार्यालयात गुप्तपणे एक (Spy Wi-Fi Metal Clock) भिंतीवरील घड्याळ बसवले, ज्यामध्ये स्पाय कॅमेरा लपवलेला होता. आरोपी जेव्हा पैशांची आणि दिल्लीतील सेटिंगची बतावणी करत होते, तेव्हा त्यांचे संपूर्ण संभाषण आणि पैशांची देवाणघेवाण कॅमेऱ्यात कैद होत होती.
३० मे रोजी सकाळी टोकन रक्कम घेण्यासाठी आरोपी कार्यालयात पोहोचले. ठगांना पूर्णपणे जाळ्यात ओढण्यासाठी भुतडा यांनी एक भन्नाट शक्कल लढवली. त्यांनी एका बॅगेत ‘रद्दी’ भरली आणि त्यावर ५०० रुपयांच्या खऱ्या नोटांचे बंडल अशा पद्धतीने ठेवले की वरकरणी पाहणाऱ्याला बॅग नोटांनी गच्च भरलेली वाटेल.
बॅग हातात पडली, पण नशीब फुटले!
ठरल्याप्रमाणे गणेश राठोड आणि विश्वजित राठोड हे दोघे कार्यालयात आले. समोर नोटांनी भरलेली बॅग पाहून त्यांचे डोळे चमकले. त्यांनी ती बॅग ताब्यात घेतली आणि कार्यालयाबाहेर पाऊल टाकलेच होते, तेवढ्यात आधीच दबा धरून बसलेल्या (Avadhutwadi Police Action) अवधूतवाडी पोलिसांनी त्यांना रंगेहात झडप घालून ताब्यात घेतले. त्यानंतर या संपूर्ण रॅकेटचा मुख्य सूत्रधार लौकिक फुलकर यालाही बेड्या ठोकण्यात आल्या.
अटक करण्यात आलेल्या आरोपींची नावे:
१. लौकिक जगन्नाथ फुलकर
२. विश्वजित सुरेश राठोड
३. गणेश लालसिंग राठोड
महाजाळे की फक्त स्थानिक ठग? पोलिसांचा तपास सुरू
या हायप्रोफाइल कारवाईमुळे राजकीय वर्तुळात मोठी खळबळ उडाली आहे. केंद्र सरकारच्या नावाचा वापर करून एवढी मोठी रक्कम मागण्याचे धाडस करणाऱ्या या टोळीच्या मागे आणखी कोणत्या मोठ्या पांढरपेशा चेहऱ्यांचा वरदहस्त आहे का? या रॅकेटची पाळेमुळे थेट दिल्लीपर्यंत पोहोचली आहेत की हा केवळ स्थानिक भामट्यांचा डाव होता? याचा सखोल तपास आता पोलीस करत आहेत. मात्र, भुतडा यांच्या डिजिटल स्टिंग ऑपरेशनमुळे देशातील एका मोठ्या फसवणुकीच्या रॅकेटचे बिंग फुटल्याचे मानले जात आहे.
