महाराष्ट्र हवामान अपडेट: राज्यावर दुहेरी संकट! एका बाजूला उष्णतेची लाट तर दुसरीकडे गारपीटीसह अवकाळीचा तडाखा

मुंबई,दि.२३: महाराष्ट्रातील हवामानात सध्या मोठी उलथापालथ (Climate Change) होताना दिसत आहे. राज्यावर सध्या ‘दुहेरी संकट’ ओढवले असून, एकीकडे कडाक्याचे ऊन आणि दुसरीकडे अवकाळी पावसाने (Unseasonal Rain) हाहाकार माजवला आहे. भारतीय हवामान विभागाने (IMD) मध्य महाराष्ट्र आणि मराठवाड्यात पावसाचा इशारा दिला असून, काही जिल्ह्यांमध्ये गारपीटीची (Hailstorm) शक्यता वर्तवली आहे.

शेतकरी राजा चिंतेत; पिकांचे प्रचंड नुकसान

गेल्या दोन-तीन दिवसांपासून राज्याच्या विविध भागात पावसाने हजेरी लावली आहे. यामुळे हाताशी आलेली पिके उद्ध्वस्त झाली असून बळीराजा संकटात सापडला आहे. नाशिक जिल्ह्यातील येवला तालुक्यात कुसुर, कुसमाडी, अंकाई आणि नायगव्हाण परिसरात गारपीटीने शेकडो हेक्टरवरील कांदा शेती (Onion Farming) मातीमोल झाली आहे. कुसमाडी येथील शेतकरी दिलीप मेंगाळ यांचा काढणीला आलेला १० एकर कांदा खराब झाल्याने त्यांनी शासनाकडे तातडीने नुकसान भरपाईची (Compensation) मागणी केली आहे.

पुढील ४ दिवस ‘येलो अलर्ट’ (Yellow Alert)

पुणे हवामान विभागाने दिलेल्या अंदाजानुसार, आजपासून पुढील चार दिवस दक्षिण मध्य महाराष्ट्र, विदर्भ आणि मराठवाड्यातील काही जिल्ह्यांमध्ये वादळी वाऱ्यासह (Thunderstorm) पाऊस आणि गारपीट होण्याची शक्यता आहे. विशेषतः सोलापूर, सांगली, सातारा, धाराशिव, लातूर, परभणी, बीड, चंद्रपूर आणि यवतमाळ या जिल्ह्यांमधील नागरिकांना सतर्कतेचा इशारा (Warning) देण्यात आला आहे.

कोकणात उष्णतेचा कडाका; आरोग्याची काळजी घेण्याचे आवाहन

एककीकडे पाऊस असताना, कोकण किनारपट्टीवर मात्र उष्णतेची लाट (Heat Wave) कायम आहे. मुंबई, ठाणे, रायगड आणि रत्नागिरी जिल्ह्यांमध्ये तापमानाचा पारा चढणार असून, नागरिकांनी दुपारी १२ ते ४ या वेळेत अत्यंत आवश्यक काम असल्याशिवाय घराबाहेर पडू नये, असे आवाहन प्रशासनाकडून करण्यात आले आहे. हवामानातील या टोकाच्या बदलांमुळे (Fluctuating Weather) नागरिकांच्या आरोग्यावरही विपरीत परिणाम होत आहेत.

स्थानिक भागात पावसाची जोरदार हजेरी

सोलापूर जिल्ह्यातील करमाळा शहर आणि ग्रामीण भागात (Karmala Taluka) वादळी वाऱ्यासह पावसाने जोरदार बॅटिंग केली. कंदर आणि सातोली परिसरात गारांचा पाऊस झाल्याने शेतीचे मोठे नुकसान झाले आहे. तसेच सोलापूर, सांगली, सातारा, सिंधुदुर्ग, पुणे, धाराशिव, कोल्हापूर, लातूर आणि नांदेड या भागात विजांच्या कडकडाटासह पाऊस होण्याची शक्यता वर्तवण्यात आली आहे.