सोलापूर,दि.८: शहरात सध्या बीपीसीएल, आयओसीएल आणि एचपीसीएल या कंपन्यांच्या गॅस एजन्सीबाहेर ई-केवायसी (e-KYC) आणि सिलेंडर बुकिंगच्या माहितीसाठी नागरिकांची मोठी गर्दी होत आहे. या पार्श्वभूमीवर, नागरिकांनी रांगेत उभे न राहता प्रशासनाने उपलब्ध करून दिलेल्या QR कोडचा वापर करून घरी बसूनच ई-केवायसी पूर्ण करावी, असे आवाहन जिल्हाधिकारी कार्तिकेयन एस. यांनी केले आहे.
महत्त्वाचे मुद्दे:
• पुरेसा साठा उपलब्ध: सोलापूर जिल्हा आणि शहरासाठी पेट्रोल, डिझेल आणि एलपीजी गॅसचा मागणीनुसार पुरेसा साठा उपलब्ध आहे. त्यामुळे नागरिकांनी घाबरून जाण्याचे कारण नाही.
• ऑनलाइन बुकिंगला प्राधान्य द्या: नागरिकांनी गॅस सिलेंडरसाठी ऑनलाइन बुकिंग करावे. नोंदणीनंतर विहित कालावधीत सिलेंडर घरपोच मिळेल, अशी ग्वाही प्रशासनाने दिली आहे.
• अफवांवर विश्वास ठेवू नका: गॅस टंचाईबाबत पसरणाऱ्या कोणत्याही अफवांवर विश्वास ठेवू नका आणि गरज नसताना आगाऊ बुकिंग करू नका, असेही जिल्हाधिकाऱ्यांनी स्पष्ट केले.
तक्रार निवारण केंद्राची स्थापना
गॅस एजन्सींवरील गर्दी कमी करण्यासाठी आणि ग्राहकांच्या शंकांचे निरसन करण्यासाठी जिल्हा प्रशासनाने विशेष तक्रार निवारण केंद्र उभारले आहे. या केंद्रात खालील प्रतिनिधी नियुक्त करण्यात आले आहेत.
1. पुरवठा विभागाचे ३ कर्मचारी.
2. HPCL, BPCL आणि IOCL या कंपन्यांचे प्रत्येकी १ प्रतिनिधी.
हे कर्मचारी ग्राहकांच्या तक्रारींचे तात्काळ निवारण करून त्यांना मार्गदर्शन करत आहेत. नागरिकांनी एजन्सीवर गर्दी करण्याऐवजी डिजिटल पर्यायांचा वापर करून प्रशासनाला सहकार्य करावे, असे आवाहन करण्यात आले आहे.
