मुंबई,दि.६: अशोक खरात प्रकरणाने आता राज्याच्या राजकारणात मोठी खळबळ उडवून दिली आहे. सामाजिक कार्यकर्त्या अंजली दमानिया यांनी पुन्हा एकदा आक्रमक पवित्रा घेत खरात याचे अनेक बड्या नेत्यांशी असलेले संबंध पुराव्यासह उघड केल्याचा दावा केला आहे. यामध्ये प्रामुख्याने रुपाली चाकणकर आणि सुनील तटकरे यांच्यासह सत्ताधारी आणि विरोधी पक्षातील नेत्यांच्या नावांचा समावेश आहे.
नेमका दावा काय?
दमानिया यांनी सांगितले की, एका अनोळखी व्यक्तीने त्यांना सीडीआर (Call Detail Record) उपलब्ध करून दिला आहे. हा डेटा १ एप्रिल २०२४ ते २५ मार्च २०२६ या कालावधीतील आहे. दमानिया यांच्या दाव्यानुसार:
• रुपाली चाकणकर आणि अशोक खरात यांच्यातील कॉलचे पुरावे समोर आले आहेत.
• मुख्यमंत्री एकनाथ शिंदे यांचे १७ कॉल्स रेकॉर्डमध्ये असल्याचा दावा त्यांनी केला आहे.
• मिलिंद नार्वेकर यांचे ८ कॉल्स, तर संजय शिरसाट यांचेही नाव या यादीत आहे.
देवेंद्र फडणवीस यांच्याकडून चौकशीचे संकेत
या प्रकरणावर गृहमंत्री देवेंद्र फडणवीस यांनी कडक भूमिका घेतली असून, “कोणीही अशा प्रकारे अनधिकृतपणे सीडीआर देऊ शकत नाही, या प्रकरणाची सखोल चौकशी केली जाईल,” असे स्पष्ट केले आहे. यावर दमानिया यांनी प्रत्युत्तर देताना म्हटले की, “मी केवळ आलेली माहिती समोर ठेवली आहे, आम्ही विषयांवर लढतो, फालतू राजकारण करत नाही.”
या नेत्यांना दमानियांकडून ‘क्लीन चिट’
विशेष म्हणजे, दमानिया यांनी अनेक नेत्यांची नावे घेऊन त्यांचे खरातशी कोणतेही संबंध नसल्याचे सांगितले. यामध्ये पंकजा मुंडे, धनंजय मुंडे, भागवत कराड, अब्दुल सत्तार, रामदास कदम, सुषमा अंधारे आणि संजय राऊत यांचा समावेश आहे. “मी सर्व नंबर्स क्रॉस चेक केले असून या नेत्यांचा एकही कॉल आढळला नाही,” असे त्यांनी स्पष्ट केले.
