मुंबई,दि.7: राष्ट्रवादीचे (शरद पवार गट) आमदार उत्तम जानकर (Uttam Jankar) यांनी मोठा निर्णय घेतला आहे. माळशिरस विधानसभा मतदारसंघातून जानकर विजयी झाले आहेत. भाजपचे राम सातपुते आणि उत्तम जानकर यांच्यात चुरसीची लढत पाहायला मिळाली होती. यात जानकर विजयी झाले. माळशिरस विधानसभा मतदारसंघातील मारकवाडी येथील नागरिकांनी निकालानंतर ईव्हीएम मशीनवर संशय व्यक्त केला होता.
मारकवाडी गावातील नागरिकांचे म्हणणे होते की आमच्या गावातून भाजपाच्या उमेदवार राम सातपुते यांना लिड मिळणे शक्यच नाही. मारकवाडी गावातील नागरिकांनी 3 डिसेंबरला बॅलेट पेपवर मतदान घेण्याचा निर्णय घेतला होता. मात्र प्रशासनाकडून परवानगी नाकारण्यात आली.
आमदार उत्तम जानकर यांनी आमदारकीचा राजीनामा देण्याची घोषणा केली आहे. tv9 मराठीशी बोलताना जानकर म्हणाले की, मी आमदारकीचा राजीनामा देणार असून भाजपचे पराभूत उमेदवार राम सातपुते हेही माळशिरस विधानसभा मतदारसंघात बॅलेट पेपरवर निवडणूक घ्यावी अशी मागणी करणार आहेत. मी आणि सातपुते निवडणूक आयोगाकडे बॅलेट पेपवर निवडणूक घेण्याची मागणी करणार आहोत.
निवडणूक आयोग जर बॅलेट पेपरवर निवडणूक घेण्यास तयार झाले तर मी लगेच राजीनामा देणार आहे, असे जानकर म्हणाले. बॅलेट पेपरवर निवडणूक झाल्यानंतर सत्य काय आहे? हे सर्व जनतेसमोर येईल, माझी 1 लाख मते ईव्हीएम द्वारे ट्रान्सफर करण्यात आली आहेत असे जानकर म्हणाले. जर या निवडणुकीत राम सातपुते यांचा विजय झाला तर ते मंत्री होतील. आमच्या मतदारसंघाला मंत्रीपद मिळाल्याचा आनंदच होईल असे जानकर म्हणाले.
