चंद्रपूर,दि.१९: शिक्षकी पेशाला काळीमा फासणारी घटना घडली आहे. अलीकडच्या काळात शिक्षकांच्या अत्त्याचाराच्या घटना वाढल्या आहेत. शिक्षकाने ७ शालेय विद्यार्थिनींवर अत्याचार केल्याचा धक्कादायक प्रकार जिल्ह्याच्या शेवटचा टोकावर असलेल्या जिवती तालुक्यात घडला आहे. अल्पवयीन विद्यार्थिनींना पेपर तपासण्याच्या बहाण्याने कार्यालयात बोलावून वर्षभरापासून अत्याचार केल्याची तक्रार पालकांनी केली आहे. याप्रकरणी नराधम शिक्षक अच्छुत खोबाजी राठोड (४९) याला जिवती पोलिसांनी अटक केली आहे.
जिवती तालुक्यातील एका गावात पहिली ते पाचवीपर्यंतच्या जिल्हा परिषद शाळेत आरोपी नराधम शिक्षक अल्पवयीन विद्यार्थिनींना कार्यालयात आळीपाळीने बोलवायचा. त्यानंतर अश्लिल चाळे करुन अत्याचार करायचा. हा प्रकार गेल्या एक वर्षापासून सुरू होता. अखेर एका मुलीने आईला ही घटना सांगितल्यानंतर आरोपी शिक्षकाचा प्रकार समोर आला.
जिवती पोलीस ठाण्यात याप्रकरणी तक्रार दाखल केल्यानंतर पास्को अंतर्गत गुन्हा दाखल करून आरोपी शिक्षकाला अटक करण्यात आली आहे. आरोपी शिक्षकाने सात विद्यार्थिनींसोबत हा घृणास्पद प्रकार केल्याचे समोर आले. आरोपी शिक्षकाला मंगळवारी न्यायालयात हजर करणार असल्याची माहिती पोलिसांनी दिली. घटनेचा तपास महिला पोलीस उपनिरीक्षक करत आहेत.
