चित्रकूट,दि.७: गुरु-शिष्य परंपरेला काळिमा फासणारी एक धक्कादायक घटना उत्तर प्रदेशातील चित्रकूट जिल्ह्यात समोर आली आहे. एका प्राथमिक शाळेच्या मुख्याध्यापिकेने चक्क विद्यार्थ्यांकडून स्वतःची मालिश (मसाज) करून घेतल्याचा प्रकार उघडकीस आला आहे. या घटनेचा व्हिडीओ सोशल मीडियावर वाऱ्यासारखा पसरल्यानंतर शिक्षण विभागात खळबळ उडाली असून, संबंधित मुख्याध्यापिकेला तातडीने निलंबित करण्यात आले आहे.
नेमकी घटना काय?
चित्रकूट जिल्हा मुख्यालयांतर्गत येणाऱ्या ‘नया बाजार’ प्राथमिक शाळेत हा प्रकार घडला. व्हायरल व्हिडीओमध्ये मुख्याध्यापिका मधु राय या जमिनीवर आरामात पडलेल्या असून, लहान विद्यार्थी त्यांचे हात-पाय दाबताना दिसत आहेत. विशेष म्हणजे, विद्यार्थी सेवा करत असताना मुख्याध्यापिका निर्लज्जपणे मोबाईल फोन वापरण्यात मग्न होत्या. याशिवाय, त्या विद्यार्थ्यांकडून वारंवार डोक्याचे केस विंचरून घेत असल्याच्या तक्रारीही स्थानिक रहिवाशांनी केल्या आहेत.
तपासात धक्कादायक बाबी समोर
या प्रकरणाची गंभीर दखल घेत जिल्हा मूलभूत शिक्षण अधिकारी (BSA) बी.के. शर्मा यांनी ब्लॉक शिक्षण अधिकाऱ्यांना चौकशीचे आदेश दिले होते. चौकशीदरम्यान अनेक धक्कादायक गोष्टी समोर आल्या:
• साक्षीदारांची पुष्टी: शाळेतील विद्यार्थी आणि माध्यान्ह भोजन (MDM) बनवणाऱ्या स्वयंपाकींनी मुख्याध्यापिका मुलांकडून मालिश करून घेत असल्याच्या वृत्ताला दुजोरा दिला.
• हजेरीचा घोळ: शाळेत ६८ विद्यार्थ्यांची नोंदणी असताना प्रत्यक्षात केवळ ७ विद्यार्थी उपस्थित होते, मात्र रेकॉर्डवर जास्त उपस्थिती दाखवून गैरप्रकार केला जात असल्याचेही उघड झाले.
• मुख्याध्यापिकेचा बचाव: आरोपी मुख्याध्यापिका मधु राय यांनी व्हॉट्सअॅपद्वारे उत्तर पाठवून सर्व आरोप फेटाळले आहेत, मात्र पुराव्यांसमोर त्यांचा बचाव फोल ठरला.
