मुंबई,दि.२५: Tamil Actor Srikanth Arrested | तमिळ चित्रपटसृष्टीतील अभिनेता श्रीकांत (Tamil Actor Srikanth) कायदेशीर अडचणीत सापडला आहे. पोलिसांनी जवळपास आठ तास चौकशी केल्यानंतर अभिनेत्याला अटक केली. न्यायालयाने न्यायालयीन कोठडीत पाठवले आहे. तो ७ जुलैपर्यंत न्यायालयीन कोठडीत राहील. ड्रग्जशी संबंधित एका प्रकरणात श्रीकांतवर ही कारवाई करण्यात आली आहे.
ड्रग्जच्या वापराची पुष्टी | Tamil Actor Srikanth Arrested
पोलिसांनी श्रीकांतच्या रक्ताचे नमुने किलपॉक मेडिकल कॉलेज रुग्णालयात वैद्यकीय चाचणीसाठी गोळा करण्यात आल्याची माहिती दिली. त्यानंतर तपासात अभिनेत्याच्या शरीरात ड्रग्जची उपस्थिती निश्चित झाली. पोलिसांनी सांगितले की, यानंतर, श्रीकांतला सोमवारी रात्री एग्मोर येथील १४ व्या मेट्रोपॉलिटन मॅजिस्ट्रेटच्या निवासस्थानी नेण्यात आले आणि रिमांडवर घेण्यात आले. आता त्याला ७ जुलैपर्यंत न्यायालयीन कोठडीत पाठवण्यात आले आहे.
काल या अभिनेत्याची चौकशी करण्यात आली
सोमवारी अण्णा द्रमुकचे माजी पदाधिकारी टी. प्रसाद यांना ताब्यात घेतल्यानंतर नुंगमबक्कम पोलिस ठाण्यात या अभिनेत्याची चौकशी करण्यात आली. ४६ वर्षीय श्रीकांत आणि आणखी एका अभिनेत्याला प्रसाद यांनी कोकेन पुरवल्याचा पोलिसांना संशय आहे. या संपूर्ण प्रकरणाच्या चौकशीनंतर आता हे पाऊल उचलण्यात आले आहे.
११ ग्रॅम ड्रग्ज जप्त केल्याची माहिती
गेल्या आठवड्यात, नुंगमबक्कम पोलिसांनी सालेम येथील प्रदीप कुमारला अटक केली आणि त्याच्याकडून मिळालेल्या माहितीच्या आधारे, त्यांनी घाना येथील जॉनला राज्यातील होसूर येथून अटक केली. पोलिसांनी सांगितले की त्यांच्याकडून सुमारे ११ ग्रॅम ड्रग्ज जप्त करण्यात आले आहेत.
