सांगली,दि.१४: Sangali Crime | ग्रामपंचायत निवडणुकीत २२ वर्षीय तरुणाची हत्या झाल्याची घटना घडली आहे. राज्यभरात ग्रामपंचायत निवडणुकीची धामधूम सुरू असताना सांगली जिल्ह्यात मात्र एक भयंकर घटना घडली आहे. निवडणुकीचा प्रचार करत असताना राष्ट्रवादी काँग्रेसच्या कार्यकर्त्याची हत्या करण्यात आली आहे. ही घटना मिरज तालुक्यातील सोनी येथे घडली असून अक्षय उर्फ आकाश माणिक नरुटे (वय २२) असं खून झालेल्या तरुणाचं नाव आहे (वय २२) असं खून झालेल्या तरुणाचं नाव आहे. याप्रकरणी मिरज ग्रामीण पोलिसांनी दोघांना ताब्यात घेतलं असून खून कोणत्या कारणातून केला, याबाबत तपास सुरू असल्याची माहिती मिरज ग्रामीण पोलिसांनी दिली आहे. या घटनेमुळे गावामध्ये एकच खळबळ उडाली आहे.
Sangali Crime | धारदार शस्त्रांनी हल्ला करून निर्घृण खून
याबाबतचे सविस्तर वृत्त असे की, मिरज तालुक्यातील सोनी ग्रामपंचायतीची निवडणूक सध्या सुरू आहे. सोमवारी रात्रीच्या सुमारास आकाश हा राष्ट्रवादी काँग्रेस पार्टीचा गावात प्रचार करत होता. यावेळी आकाशला काही जणांनी बोलावून घेतलं आणि त्याला दुचाकीवरून घेऊन गेले. त्यानंतर गावापासून काही अंतर असणाऱ्या करोली रस्त्यावरील इंग्लिश स्कूलजवळ धारदार शस्त्रांनी हल्ला करून त्याचा निर्घृण खून करण्यात आला. रात्री उशिरापर्यंत आकाश हा घरी न आल्याने त्याच्या नातेवाईकांनी शोध सुरू केला असता, इंग्लिश स्कूलच्या मैदानात तो रक्ताच्या थारोळ्यात पडलेल्या अवस्थेमध्ये आढळून आला.
या घटनेची माहिती मिळताच मिरज ग्रामीण पोलिसांनी घटनास्थळी धाव घेऊन पंचनामा करत घटनेची नोंद केली आहे. आकाशचे गावातील काही जणांसोबत नुकतेच भांडण झाले होते. या भांडणातून ही हत्या झाली असावी, असा संशय व्यक्त केला जात आहे.
दरम्यान, याबाबत मिरज ग्रामीण पोलीस ठाण्याचे पोलीस निरीक्षक नारायण देशमुख म्हणाले, अकाश याचा त्याच्या मित्रांनी खून केल्याची फिर्याद दाखल झाली आहे. त्यानुसार दोन जणांना ताब्यात घेतलं आहे. त्यांच्याकडे अधिक चौकशी सुरू असून ही हत्या नेमकी कोणत्या कारणातून करण्यात आली आहे, यामध्ये कोणाचा सहभाग होता, याचा तपास सुरू असल्याची माहिती देशमुख यांनी दिली आहे.
