सोलापूर,दि.16: मौलाना सज्जाद नोमानी (Sajjad Nomani) यांनी मोठी घोषणा केली आहे. महाराष्ट्रात विधानसभा निवडणुकीसाठी 20 नोव्हेंबर रोजी मतदान होणार आहे आणि 23 नोव्हेंबर रोजी निकाल जाहीर होणार आहेत. विधानसभा निवडणुकीच्या प्रचारात सर्वच पक्षांनी ताकद पणाला लावली आहे. दरम्यान, ऑल इंडिया मुस्लिम पर्सनल लॉ बोर्डाचे प्रवक्ते मौलाना खलील उररहमान सज्जाद नोमानी यांनी मोठी घोषणा केली होती.
महाराष्ट्र विधानसभा निवडणुकीत त्यांनी महाविकास आघाडीला पाठिंबा देण्याची घोषणा केली आहे. सज्जाद नोमानी म्हणाले की, आपण महाविकास आघाडीच्या 269 उमेदवारांना पाठिंबा देणार असून आपल्या जनतेला त्यांना मतदान करण्यास सांगणार आहे. मराठा आणि ओबीसी समाजातील 117 उमेदवारांना आमचा पाठिंबा आहे, याशिवाय 23 मुस्लिम उमेदवारांनाही पाठिंबा देणार असल्याचे त्यांनी सांगितले.
सज्जाद नोमानी म्हणाले की, महाराष्ट्रातील बऱ्याच उमेदवारांशी आम्हाला भेटायला संधी मिळाली. ते माझ्याकडे आले, आम्ही त्यांच्याकडून काही शब्द घेतलेत. त्यानंतर आम्ही एक यादी बनवली आहे. मी एका मुलाखतीत म्हटलं हा व्होट जिहाद कसा? ज्यांचे सरदार शरद पवार, उद्धव ठाकरे, राहुल गांधी, नाना पटोले आहेत असं ते म्हणाले. त्याशिवाय जर शत्रूला कुणी साथ देत असेल तर त्याला बायकॉट करा. लोकसभेच्या वेळी काहींनी भाजपाला मते दिली हे माहिती आहे, त्या मुसलमानांवर सामाजिक बहिष्कार टाकायला हवा असा इशाराही त्यांनी दिला आहे.
सोलापूर जिल्ह्यातील या उमेदवारांना पाठिंबा
सोलापूर शहर उत्तर विधानसभा मतदारसंघात भाजपचे आमदार विजयकुमार देशमुख आणि राष्ट्रवादीचे (शरद पवार गट) उमेदवार महेश कोठे यांच्यात लढत होणार आहे. मौलाना सज्जाद नोमानी यांनी महेश कोठे यांना पाठिंबा जाहीर केला आहे. बार्शी विधानसभा मतदारसंघात शिवसेना (ठाकरे गट) उमेदवार दिलीप सोपल यांना पाठिंबा दिला आहे. करमाळा विधानसभा मतदारसंघात राष्ट्रवादीचे (शरद पवार गट) नारायण पाटील यांना पाठिंबा दिला आहे.
अक्कलकोट विधानसभा मतदारसंघात काँग्रेसचे उमेदवार सिध्दाराम म्हेत्रे यांना पाठिंबा दिला आहे. माढा विधानसभा मतदारसंघात राष्ट्रवादीचे (शरद पवार गट) उमेदवार अभिजीत पाटील यांना पाठिंबा दिला आहे. मोहोळ विधानसभा मतदारसंघात राष्ट्रवादीचे (शरद पवार गट) उमेदवार राजू खरे यांना पाठिंबा दिला आहे. सांगोला विधानसभा मतदारसंघात शिवसेनेचे (ठाकरे गट) दीपक साळुंखे पाटील यांना पाठिंबा दिला आहे. माळशिरस विधानसभा मतदारसंघात उत्तम जानकर यांना पाठिंबा दिला आहे. मात्र सोलापूर दक्षिण विधानसभा मतदारसंघात अद्याप कोणत्याही उमेदवाराला पाठिंबा दिला नाही.
