पुणे,दि.२२: नाशिकमधील भोंदूबाबा अशोक खरात याच्या सेक्स स्कँडल प्रकरणाने संपूर्ण महाराष्ट्र हादरला असतानाच, आता या प्रकरणाला मोठे राजकीय वळण मिळाले आहे. राष्ट्रवादी काँग्रेस (अजित पवार गट) नेत्या आणि राज्य महिला आयोगाच्या अध्यक्षा रुपाली चाकणकर यांच्यावर गंभीर आरोप करण्यात आले आहेत. रुपाली पाटील ठोंबरे यांनी चाकणकर या महाराष्ट्रातील सर्वात मोठ्या सेक्स रॅकेटच्या सूत्रधार असल्याचा सनसनाटी दावा केला असून त्यांच्या अटकेची मागणी केली आहे.
नेमके प्रकरण काय?
अशोक खरात या भोंदूबाबाने धर्माच्या नावाखाली अनेक महिलांचे लैंगिक शोषण केल्याचे समोर आले आहे. या बाबाचे अनेक बड्या राजकीय नेत्यांसोबतचे फोटो व्हायरल झाले आहेत. विशेषतः रुपाली चाकणकर यांनी खरातला ‘गुरु’ मानल्याचे आणि त्यांच्या कुटुंबाचे त्याच्याशी जवळचे संबंध असल्याचे समोर आल्याने नागरिकांमध्ये संतापाची लाट आहे.
रुपाली ठोंबरेंचे गंभीर आरोप आणि मुख्यमंत्र्यांना पत्र
रुपाली ठोंबरे यांनी मुख्यमंत्री देवेंद्र फडणवीस यांना पत्र लिहून या प्रकरणात हस्तक्षेप करण्याची मागणी केली आहे. त्यांच्या पत्रातील प्रमुख मुद्दे खालीलप्रमाणे आहेत:
• मुख्य आरोपी करण्याची मागणी: अशोक खरातने जे काही कृत्य केले, ते चाकणकर यांच्या पाठिंब्यामुळेच शक्य झाले. त्यामुळे या रॅकेटमध्ये चाकणकरांना मुख्य आरोपी करावे.
• पत्रकारावर दबाव: गेल्या वर्षी एका पत्रकाराने खरातचा पर्दाफाश केला होता, तेव्हा चाकणकरांनी अधिकाराचा वापर करून त्या पत्रकाराला धमकी दिली आणि माफीनामा लिहून घेतल्याचा आरोप ठोंबरेंनी केला आहे.
• गुन्ह्यात प्रत्यक्ष सहभाग: खरातकडून होणाऱ्या बलात्कारांची माहिती असूनही त्याला वाचवण्यासाठी पोलिसांवर दबाव टाकण्यात आला, असा दावा ठोंबरेंनी केला आहे.
• अटकेची मागणी: “लाडक्या बहिणींच्या वतीने लाडक्या भावाला (मुख्यमंत्री) विनंती आहे की, चाकणकरांना तात्काळ ताब्यात घेऊन त्यांची चौकशी करावी,” असे पत्रात म्हटले आहे.
“अशोक खरातने केलेल्या लैंगिक शोषणाचे व्हिडिओ दाबण्यासाठी आणि त्याला वाचवण्यासाठी पोलिसांवर दबाव टाकण्यात आला. यावरून रुपाली चाकणकर यांचा या गुन्ह्यात प्रत्यक्ष सहभाग असल्याचे स्पष्ट होते.” रुपाली पाटील ठोंबरे
सध्या वावी पोलीस स्टेशनमध्ये याप्रकरणी गुन्हा दाखल असून, या राजकीय आरोपांमुळे आता गृह विभाग आणि पोलीस काय पावले उचलतात, याकडे संपूर्ण राज्याचे लक्ष लागले आहे.
