मुंबई,१३: Narendra Modi On Ujjwal Nikam: पंतप्रधान नरेंद्र मोदी यांनी प्रसिद्ध वकील उज्ज्वल निकम यांना फोन केला आणि म्हणाले, “हिंदीत बोलावे की मराठीत”. प्रसिद्ध वकील निकम यांना राज्यसभेवर संधी मिळाली आहे. राष्ट्रपती द्रौपदी मुर्मू यांनी माजी परराष्ट्र सचिव हर्षवर्धन श्रृंगला, मुंबई हल्ला प्रकरणातील सरकारी वकील उज्ज्वल निकम, शिक्षणतज्ज्ञ सी. सदानंदन मास्टर आणि दिल्लीच्या इतिहासकार मीनाक्षी जैन यांना राज्यसभेसाठी नामांकित केले आहे. शनिवारी रात्री उशिरा जारी केलेल्या अधिसूचनेत केंद्रीय गृह मंत्रालयाने म्हटले आहे की, राष्ट्रपतींनी या चौघांनाही राज्यसभेसाठी नामांकित केले आहे.
राज्यसभेसाठी नामांकन मिळाल्यानंतर पंतप्रधान मोदींनी (Narendra Modi) उज्ज्वल निकम (Ujjwal Nikam) यांच्याशी फोनवर संवाद साधला आहे. याबद्दल माहिती देताना ज्येष्ठ वकील म्हणाले, ‘मला नामांकन दिल्याबद्दल मी राष्ट्रपती द्रौपदी मुर्मू यांचे आभार मानतो. लोकसभा निवडणुकीच्या प्रचारादरम्यान मी पंतप्रधान नरेंद्र मोदींना भेटलो तेव्हा त्यांनी माझ्यावर विश्वास व्यक्त केला. काल पंतप्रधान नरेंद्र मोदींनी माझ्या नामांकनाबद्दल माहिती देण्यासाठी मला फोन केला.’
निकम यांच्याशी मराठीत संवाद | Narendra Modi On Ujjwal Nikam
निकम पुढे म्हणाले, ‘पंतप्रधान मोदींनी मला विचारले की त्यांनी हिंदीत बोलावे की मराठीत, यावर आम्ही दोघेही हसायला लागलो. त्यानंतर पंतप्रधान मोदींनी माझ्याशी मराठीत बोलून सांगितले की राष्ट्रपती मला जबाबदारी देऊ इच्छितात, त्यानंतर त्यांनी मला राष्ट्रपतींच्या निर्णयाबद्दल सांगितले. मी लगेच हो म्हटले, मी पक्ष नेतृत्वाचे आभार मानतो.’
पंतप्रधान मोदींनी केले अभिनंदन
पंतप्रधान नरेंद्र मोदी यांनी राज्यसभेवर नामांकित झालेल्या चारही सदस्यांचे अभिनंदन केले आहे. उज्ज्वल निकम यांचे कायदेशीर क्षेत्र आणि संविधानाप्रती असलेले समर्पण अनुकरणीय असल्याचे सांगून त्यांनी Xवर पोस्ट केले की ते केवळ एक यशस्वी वकील राहिले नाहीत तर महत्त्वाच्या प्रकरणांमध्ये न्याय मिळवून देण्यातही आघाडीवर राहिले आहेत.
