नवी दिल्ली,दि.२: Bulli Bai App: मुस्लिम महिलांना बुल्लीबाई (Bulli Bai ) या अ‍ॅपच्या माध्यमातून गेल्या काही दिवसांपासून लक्ष्य करून बदनाम करण्यात येत असून याबाबत एका पीडित महिला पत्रकाराने दिल्ली पोलिसांच्या सायबर सेलकडे तक्रार केली आहे. दरम्यान, शिवसेना खासदार प्रियांका चतुर्वेदी यांनीही याविरोधात आवाज उठवला असून त्याची केंद्र सरकारकडून गंभीर दखल घेण्यात आली आहे.
काही महिन्यांपूर्वी सुल्लीडील अ‍ॅप चर्चेत आले होते. आता तशाच प्रकारे बुल्लीबाई अ‍ॅप आणले गेले आहे. गिटहब या प्लॅटफॉर्मवर हे अ‍ॅप लॉन्च करण्यात आले असून या अ‍ॅपच्या माध्यमातून मुस्लिम महिलांची कशाप्रकारे बदनामी केली जात आहे, याचं धक्कादायक वास्तवच एका महिला पत्रकाराने समोर आणलं आहे. या पत्रकाराने ट्वीटरच्या माध्यमातून स्वत:ला आलेला अनुभव कथन केला आहे. त्याचवेळी या पत्रकाराने दिल्ली पोलिसांच्या सायबर सेलकडे याबाबत ऑनलाइन तक्रार केली आहे. ‘बुल्लीबाई अ‍ॅपवर माझा एक मॉर्फ केलेला फोटो पोस्ट करण्यात आला असून माझी बदनामी केली जात आहे. याची गंभीर दखल घेऊन संबंधितांवर तत्काळ कारवाई करण्यात यावी’, अशी मागणी महिला पत्रकाराने तक्रारीत केली आहे. त्याची दखल घेत पोलिसांनी अज्ञात व्यक्तीविरुद्ध गुन्हा दाखल करून चौकशी सुरू केली आहे.
अ‍ॅपवर नेमकं काय चालतं?
बुल्लीबाई अ‍ॅप उघडल्यानंतर रँडमली मुस्लिम महिलांचे फोटो दिसत राहतात. युजर त्यातील एखादा फोटो ‘बुल्ली बाई ऑफ द डे’ म्हणून सीलेक्ट करतो. त्यानंतर त्यावर अश्लील आणि आक्षेपार्ह कमेंट केल्या जातात आणि त्या फोटोवर बोली लावली जाते. मग हा फोटो BulliBai या हॅशटॅगने दिवसभर ट्रेंड केला जातो. सध्या ट्वीटर आणि फेसबुकवर अधिक सक्रिय असलेल्या किमान १०० महिलांना या अ‍ॅपवरून लक्ष्य करण्यात येत आहे. मीडियासह इतर क्षेत्रातील महिलांचाही त्यात समावेश आहे.
शिवसेनेने उठवला आवाज; केंद्राने घेतली दखल
शिवसेना खासदार प्रियांका चतुर्वेदी यांनी इंटरनेटवरील या धक्कादायक प्रकाराविरोधात सातत्याने आवाज उठवला आहे. याबाबत त्यांनी दोन वेळा केंद्रीय माहिती आणि प्रसारण मंत्र्यांना पत्र लिहिलं आहे. त्यानंतर कालच चतुर्वेदी यांनी ट्वीटरच्या माध्यमातून आवाज उठवत याप्रकरणात अद्याप कोणालाही अटक का केली केली गेली नाही, असा सवाल केला होता. त्यावर माहिती आणि प्रसारणमंत्री अश्विनी वैष्णव यांनी स्पष्टीकरण देत महत्त्वाची माहिती दिली आहे. संबंधित युजरला ब्लॉक करण्यात आल्याचे गिटहबकडून सांगण्यात आले आहे. याबाबत कंप्युटर इमर्जन्सी रिस्पॉन्स टीम आणि पोलीस अधिक चौकशी करत आहेत, असे अश्विनी यांनी चतुर्वेदी यांना सांगितले आहे. दुसरीकडे प्रियांका चतुर्वेदी यांनी मुंबईचे पोलीस आयुक्त हेमंत नगराळे आणि पोलीस उपायुक्त (सायबर गुन्हे) रश्मी करंदीकर यांच्याशी याबाबत चर्चा केली आहे. त्याचवेळी महाराष्ट्राच्या पोलीस महासंचालकांचेही त्यांनी याकडे लक्ष वेधले आहे.
