दि.२४: लग्न म्हटले की वर व वधू दोन्ही बाजूच्या पाहुणे मंडळींची उपस्थिती असते. भारतात अनेक लग्नात गर्दी असते. दोन्हीकडचे कोणा कोणाला निमंत्रण द्यायचे ते ठरवतात. अलीकडे लग्नात जास्त गर्दी होऊ नये याचीही काहीजण काळजी घेतात. मोजक्याच लोकांना आमंत्रित केले जाते. देशात लग्नात पाहुणे मंडळी वधू व वराला आहेर करतात. मात्र, एक देश असाही आहे, जिथे पैसे देऊन पाहुणे बोलावले जातात (Paid Guests in Wedding). कारण लग्नात जितके पाहुणे दिसतील, तितकं त्यांचं सोशल सर्कल मोठं दिसेल.
दोन कुटुंबाचे नाते जुळवण्याचा उत्सव म्हणजे लग्न. त्यामुळे यात त्यांचं सोशल स्टेटसही (Social Status) दिसतं. दक्षिण कोरियातील लोकांसाठी लग्नात अधिकाधिक लोक सहभागी होणं म्हणजे समाजातील त्यांच्या लोकप्रियतेचा पुरावा असतो. इथे मोठं कुटुंब आणि मित्र परिवार दाखवण्यासाठी लोक पैसे गेस्ट बोलवतात. तुम्हाला हे जाणून आश्चर्य़ वाटेल की यासाठी एजन्सीही चालवल्या जातात.
दक्षिण कोरियामध्ये अनेक एजन्सीज वेडिंग गेस्ट्सचा बिजनेस करत आहेत. या एजन्सी लग्नासाठी भाड्यानं पाहुणे उपलब्ध करून देतात. हे पाहुणे अगदी ट्रेंड असतात आणि लग्नात अशी अॅक्टिंग करतात जणू काही ते या कुटुंबाचे जवळचे नातेवाईक आहेत. Hagaek Friends सारख्या अनेक एजन्सी फेक गेस्ट उपलब्ध करून देण्यासाठी प्रसिद्ध आहेत. हे लग्नातील रिकाम्या सीट भरून देतात. कोरोना काळात मात्र या एजन्सीज संकटात आल्या. मात्र, आता पुन्हा एकदा त्यांचा बिजनेस सुरळित सुरू झाला आहे, कारण लग्नाचा सीझन पुन्हा सुरू झाला आहे.
आधी दक्षिण कोरियात ९९ हून अधिक लोक लग्नात सहभागी होऊ शकत नव्हते. मात्र, आता ही संख्या २५० करण्यात आली आहे. एजन्सीजनं सांगितलं, की निर्बंध शिथील झाल्यापासून त्यांना भरपूर कॉल येत आहेत. आधी लोकांनी भाड्यानं केवळ ५-१० च पाहुणे हवे असत. मात्र, आता २० ते २५ पाहुणे पाहिजे असतात. एक पाहुणा भाड्याने या लग्नात जाण्यासाठी १५०० रुपये घेतो.
