जळगाव,दि.८: Cylinder Explodes: गॅसगळतीतून सिलेंडरचा स्फोट होऊन आचारी (स्वयंपाकी) जागीच ठार झाला. मंगळवारी सायंकाळी ५.३० वाजता जानकीनगरात ही घटना घडली. बन्सीलाल सुवालाल पांडे (वय ५५, मुळ रा. कावळस, ता. आसिन, जि. भिलवाडा, राजस्तान) असे मृताचे नाव आहे. बालकिशन गणेशलाल जोशी (वय ५०, रा. जानकीनगर) हे जखमी झाले आहेत.
जानकी नगरात राहणाऱ्या बन्सीलाल पांडे लग्न समारंभात स्वयंपाक तयार करुन देण्याचे काम करतात. पांडे यांच्यासह त्यांच्या पत्नी गौरीदेवी व इतर मदतनीस करीत असतात. घराच्या कंपाऊंडमध्ये ते स्वयंपाक करतात. मंगळवारी नेहमीप्रमाणे एका समारंभाच्या ऑर्डसाठी ते गुलाबजाम तयार करीत होते. यावेळी त्यांनी व्यावसायिक सिलेंडरला दोन शेगड्या जोडलेल्या होत्या. यातील एका शेगडीजवळ नळीतून गॅसगळती झाल्यामुळे मोठा स्फोट झाला.
यावेळी सिलेंडरच्या जवळ बसलेले स्वयंपाकी बन्सीलाल पांडे यांच्या चेहरा पूर्णपणे भाजला. यामुळे त्यांचा जागीच मृत्यू झाला. तर काही अंतरावर बसलेला दुसरा स्वयंपाकी बालकिशन गणेशलाल जोशी यांना आगीच्या झळा बसल्याने ते गंभीर जखमी झाले. चार दिवसांपूर्वी त्यांच्या पत्नी गौरीदेवी ह्या मुळगावी गेल्या होत्या. त्यामुळे मंगळवारी पांडे यांच्या मदतीला जोशी हे स्वयंपाकी आले होते. स्फोटाचा आवाज होताच परिसरातील नागरिकांनी घटनास्थळी धाव घेतली.
