मुंबई,दि.13: भाजपाकडून लोकसभेसाठी उमेदवारांची दुसरी यादी जाहीर करण्यात आली आहे. भारतीय जनता पक्षाने बुधवारी (13 मार्च) लोकसभा निवडणुकीसाठी उमेदवारांची दुसरी यादी जाहीर केली. भाजपच्या दुसऱ्या यादीत 72 नावे जाहीर करण्यात आली आहेत. केंद्रीय रस्ते वाहतूक आणि महामार्ग मंत्री नितीन गडकरी यांना महाराष्ट्राच्या नागपूर मतदारसंघातून उमेदवारी देण्यात आली आहे. गडकरी या जागेवरून विद्यमान खासदार आहेत. केंद्रीय मंत्री पीयूष गोयल आणि एक दिवसापूर्वी हरियाणाच्या मुख्यमंत्रिपदाचा राजीनामा देणारे मनोहर लाल खट्टर यांनाही तिकीट देण्यात आले आहे. खट्टर हरियाणातील कर्नालमधून निवडणूक लढवणार आहेत. पीयूष गोयल यांना उत्तर मुंबईतून आणि केंद्रीय मंत्री अनुराग ठाकूर यांना हिमाचलमधील हमीरपूरमधून तिकीट मिळाले आहे. केंद्रीय मंत्री प्रल्हाद जोशी कर्नाटकातील धारवाडमधून निवडणूक लढवणार आहेत. यापूर्वी 2 मार्च रोजी भाजपने 195 जागांसाठी उमेदवारांची नावे जाहीर केली होती. अशा प्रकारे आतापर्यंत 267 जागांवर नावे जाहीर करण्यात आली आहेत.
दुसऱ्या यादीत भाजपचे केंद्रशासित प्रदेश दादरा आणि नगर हवेलीतून 1, दिल्लीतून 2, गुजरातमधून 7, हरियाणातून 6, हिमाचल प्रदेशातून 2, कर्नाटकातून 20, मध्य प्रदेशातून 5, महाराष्ट्रातील 20, तेलंगणामधून 6 उमेदवार आहेत. , त्रिपुरातून 6. उत्तराखंडमधून 1 उमेदवार तर 2 उमेदवारांची घोषणा करण्यात आली आहे.
यादित महाराष्ट्रातील 20 उमेदवारांचा समावेश आहे. भाजपाने काही विद्यमान खासदारांची तिकीटं कापली आहेत. तर राज्यातील काही बड्या चेहऱ्यांना लोकसभेसाठी उमेदवारी दिली आहे. बीडमधून पंकजा मुंडे, चंद्रपूरमधून सुधीर मुनगंटीवार, मुंबई उत्तर येथून पियूष गोयल, जळगावमधून स्मिता वाघ आणि पुण्यातून मुरलीधर मोहोळ ही भाजपाच्या यादीमधील लोकसभेला उमेदवारी देण्यात आलेली प्रमुख नावं आहे.
आज प्रसिद्ध केलेल्या उमेदवारांच्या यादीमध्ये भाजपानं नागरपूरमधून नितीन गडकरी यांना उमेदवारी दिली आहे. तर जालना येथून पक्षाने रावसाहेब दानवे यांना पुन्हा संधी दिली आहे. सांगलीमधून संजयकाका पाटील आणि अहमदनगरमधून सुजय विखे यांना पुन्हा उमेदवारी देण्यात आली आहे. त्याबरोबरच वर्धा येथून रामदास तडस, नांदेडमधून प्रतापराव चिखलीकर, नंदूरबारमधून हीना गावित, धुळे येथून सुभाष भामरे, रावेर येथून रक्षा खडसे, भिवंडीतून कपिल पाटील, दिंडोरी येथून भारती पवार, लातूरमधून सुधारक शृंगारे आणि माढा येथून रणजीत सिंह नाईक निंबाळकर यांना पुन्हा एकदा उमेदवारी देण्यात आली आहे.
हरियाणाचे माजी मुख्यमंत्री मनोहर लाल खट्टर यांना कर्नालमधून उमेदवारी देण्यात आली आहे. मनोहर लाल खट्टर यांनी मंगळवारीच मुख्यमंत्रिपदाचा राजीनामा दिला होता, त्यानंतर भाजपने नायबसिंग सैनी यांच्याकडे राज्याची कमान सोपवली होती. यासोबतच पक्षाने जेजेपीसोबतची युतीही तोडली. दुसरीकडे अशोक तंवर यांना सिरसामधून तिकीट देण्यात आले आहे. अशोक तंवर यांनी 2009 च्या लोकसभा निवडणुकीत काँग्रेसच्या तिकिटावर ही जागा जिंकली होती. नंतर त्यांनी काँग्रेस सोडली आणि आम आदमी पक्षात प्रवेश केला. त्यानंतर त्यांनी आम आदमी पक्ष सोडला आणि भाजपमध्ये प्रवेश केला.
