मुंबई,दि.10: Astrologer Parrot: तामिळनाडूतील कुड्डालोर मतदारसंघात एक धक्कादायक घटना समोर आली आहे. येथे पोलिसांनी एका पोपटाला अटक केली. वास्तविक, लोकांचे भविष्य सांगणाऱ्या या ज्योतिषी पोपटाने निवडणूक लढवणाऱ्या पीएमकेच्या उमेदवाराच्या विजयाची भविष्यवाणी केली होती. त्याचा व्हिडिओ समोर आल्यानंतर हे प्रकरण पोलिसांपर्यंत पोहोचले, त्यानंतर पोलिसांनी पोपटाला काही काळ अटक केली. पोपटाच्या मालकाला पोपटाला कैदेत न ठेवण्याचा इशारा देऊन सोडण्यात आले.
मिळालेल्या माहितीनुसार, चित्रपट दिग्दर्शक थांगर बचन कुड्डालोर मतदारसंघातून पीएमके म्हणजेच पट्टाली मक्कल काची पक्षाचे उमेदवार आहेत. थांगर बचन रविवारी मतदारसंघात आले होते. यावेळी ते एका प्रसिद्ध मंदिराजवळून गेले. मंदिराबाहेर एक ज्योतिषी पिंजऱ्यात पोपट घेऊन बसला होता. हा पोपट लोकांसमोर ठेवलेले कार्ड निवडून त्यांचे भविष्य सांगत होता. ठाणकर बचनही पोपटाकडे त्यांचे भविष्य जाणून घेण्यासाठी गेले. यावेळी त्यांचे समर्थकही उपस्थित होते.
पोपट पिंजऱ्यात बंद होता, तो बाहेर काढला गेला, त्यानंतर त्याच्यासमोर अनेक कार्डे ठेवण्यात आली. यापैकी एक कार्ड निवडायचे होते. पोपटाने आपल्या चोचीने एक कार्ड उचलले आणि बाजूला ठेवले. कार्डावर त्या मंदिराच्या मुख्य देवतेचे चित्र होते. कार्ड बघून पोपटाच्या मालकाने गर्जना करत त्यांना नक्कीच यश मिळेल अशी घोषणा केली.
या अंदाजाने खूश होऊन पीएमकेच्या उमेदवाराने पोपटाला केळी खायला दिली. या संपूर्ण घटनेचा व्हिडिओ सोशल मीडियावर व्हायरल झाला आहे. यानंतर पोपटाचा मालक, ज्योतिषी सेल्वराज आणि त्याचा भाऊ या दोघांना पोलिसांनी काही काळ पकडले. नंतर वनविभागाने पोपटाला कैदेत न ठेवण्याचा इशारा दिल्यानंतर त्याला सोडून देण्यात आले. पोपटाच्या मालकाकडे आणखी काही पोपट सापडले, जे जंगल परिसरात सोडले. या कारवाईनंतर पीएमकेच्या नेत्यांनी द्रमुक सरकारवर निशाणा साधला.
पीएमकेने सरकारवर निशाणा साधला
पीएमकेचे अध्यक्ष डॉ.अन्बुमणी रामादोस म्हणाले की, द्रमुक सरकारने पराभवाची बातमी सहन न झाल्याने ही कारवाई केली आहे. कुड्डालोर मतदारसंघातून दिग्दर्शक थांगर बचन यांच्या विजयाचा अंदाज पोपट यांनी वर्तवला होता. या कृतीचा निषेध केला पाहिजे. पोपटाचे भाकीत सुद्धा सहन न झालेल्या द्रमुक सरकारचे भवितव्य काय असेल?
