मुंबई,दि.१३: विधानसभा अध्यक्ष राहुल नार्वेकर यांनी १० जानेवारीला आमदार अपात्र प्रकरणी निकाल दिला आहे. एकनाथ शिंदे यांचीच शिवसेना असल्याचा निकाल नार्वेकर यांनी दिला. तसेच शिवसेना (ठाकरे गट) यांनी पक्षाची दिलेली २०१८ घटना अमान्य केली. यावेळी त्यांनी शिवसेनेच्या घटनेत झालेले बदल, उद्धव ठाकरेंची पक्षप्रमुखपदी झालेली निवड यावर प्रश्न उपस्थित केले. याबद्दल निवडणूक आयोगाला माहिती देण्यात आली नसल्याचा दावा त्यांनी केला.
नार्वेकर यांनी केलेला दावा ठाकरे गटाचे नेते खासदार अरविंद सावंत यांनी खोडून काढला आहे. २०१३ मध्ये उद्धव ठाकरेंची शिवसेना पक्षप्रमुखपदी निवड करण्यात आली. त्याची माहिती निवडणूक आयोगाला देण्यात आली. शिवसेनेच्या घटनेत पक्षप्रमुखपद निर्माण करण्यात आलं. त्या पदावर ठाकरेंची निवड झाली. याची माहिती निवडणूक आयोगाला देण्यात आली. पक्षाच्या घटनेची प्रत निवडणूक आयोगाला पाठवण्यात आली. त्याची पोचपावतीदेखील आपल्याकडे आहे, असं ठाकरे गटाचे नेते अनिल परब म्हणाले. आयोगाचा शिक्का असलेली प्रतदेखील त्यांनी दाखवली.
ठाकरे गटाचे नेते आणि खासदार अरविंद सावंत यांनीदेखील काही कागदपत्रं आणि फोटो समोर आणले आहेत. २०१३ मध्ये उद्धव ठाकरे पक्षप्रमुख झाले. तेव्हा राहुल नार्वेकर तिथेच उपस्थित होते. एकतर्फी निकाल देताना त्यांना कदाचित याचा विसर पडाला असावा, अशी टीका सावंत यांनी केली. २०१३ मध्ये उद्धव ठाकरे पक्षप्रमुख झाले. त्यानंतर आम्ही २०१४ ची लोकसभा निवडणूक सोबत लढलो. नंतर झालेली विधानसभा निवडणूक वेगळी लढलो, असं सावंत यांनी सांगितलं.
