सोलापूर,दि.६: मुलीला छळणाऱ्या पतीचा खून प्रकरणात मुलीच्या आईची (मृत व्यक्तीची सासू) व भावाची न्यायालयाने निर्दोष मुक्तता केली आहे. मोहोळ येथील क्रांती नगर मध्ये दि. १७/०६/२०१९ रोजी दुपारी १ च्या सुमारास व्यसनी जावई राजेसाब पठाण (४०) याला शिवीगाळ करुन डोक्यात लाकडी दांडके मारुन खुन केल्याच्या आरोपावरुन सासु उस्मानबी रमजान शेख (५५), मेव्हणा महिबुब रमजान शेख (२४) रा. मोहोळ यांचेविरुध्द भरण्यात आलेल्या खटल्याची सुनावणी जिल्हा व सत्र न्यायाधिश श्री मनोज शर्मा यांचेसमोर होऊन न्यायाधिशांनी दोन्ही आरोपींची निर्दोष मुक्तता केली.
या खटल्याची हकीकत अशी की, मयत राजेसाब पठाण मुळ रा. कुरनूर ता. अक्कलकोट हा त्याच्या सासुरवाडीला क्रांती नगर, मोहोळ येथे राहत होता. त्याला सर्व प्रकारचे व्यसने होती. त्याचप्रमाणे तो पत्नीचा सिगरेटचे चटके देऊन छळ करत होता. त्याच्या छळाला कंटाळून त्याची बायको घरातुन निघुन गेल्याने तो एकटा राहत असल्याने तु पण घर सोडून जा. आमचे घर खाली कर असे त्याची सासु व मेव्हणा म्हणत होते. त्या कारणावरुन झालेल्या भांडणात सासुने व मेव्हण्याने त्यास शिवीगाळ करुन मारहाण केली व डोक्यात लाकडी दांडके मारुन खून केला असे सरकार पक्षाचे म्हणणे होते.
सुनावणीवेळी आरोपीचे वकील ॲड. जयदीप माने यांनी आपल्या युक्तिवादामध्ये मयतास फेपरे येत होती आणि घटने दिवशी फेपरे येऊन पडल्याने त्याच्या डोक्याला मार लागला. परंतु आठ दिवसाच्या विलंबानंतर खोटे नेत्र साक्षीदार उभा करुन आरोपींना गुंतवलेले आहे. नेत्र साक्षीदारांच्या जबाबांवर विश्वास ठेवणे धोक्याचे आहे असा युक्तिवाद न्यायालयात केला. या खटल्यात आरोपीतर्फे ॲड. जयदीप माने ,ॲड. आर. एस. शेख(मोहोळ), ॲड. प्रणित जाधव यांनी तर सरकारतर्फे ॲड. आनंद कुर्डूकर यांनी काम पाहिले.
