नवी दिल्ली,दि.14: अभिनेता जॅकी श्रॅाफ (Jackie Shroff) यांनी उच्च न्यायालयात याचिका दाखल करून ‘भिडू’ शब्द वापरण्यास बंदी घालावी अशी मागणी केली आहे. बॉलिवूड अभिनेता जॅकी श्रॉफने कोर्टात धाव घेतली आहे. जॅकीचा आक्षेप आहे की लोक त्याच्या नावाचा वापर त्याच्या परवानगीशिवाय त्यांच्या कामासाठी करतात. यामुळे संतापलेल्या जॅकीने दिल्ली उच्च न्यायालयात असे करू नये, असा अर्ज दाखल केला आहे.
जॅकी श्रॉफ यांचा चाहता वर्ग मजबूत आहे. त्यांच्या स्टाईलमध्ये भिडू म्हटल्यावर लोक वेडे होतात. इतकंच नाही तर त्याची बोलण्याची पद्धत, चालणं, हावभाव आणि आवाजाचं मॉड्युलेशनही इतर कलाकारांपेक्षा खूप वेगळं आहे. परवानगीशिवाय आपल्या व्यक्तिमत्त्वाचा वापर होत असल्याबद्दल जॅकीने नाराजी व्यक्त केली आहे. याविरोधात अभिनेत्याने दिल्ली उच्च न्यायालयात अर्ज दाखल केला आहे.
Jackie Shroff च्या याचिकेवर सुनावणी
जॅकीच्या याचिकेनुसार, त्यांना दिल्ली उच्च न्यायालयाकडून त्यांचे नाव, फोटो, आवाज आणि भिडू शब्दाच्या वापराबाबत अधिकार हवे आहेत. त्यांनी 14 मे रोजी ही याचिका दाखल केली होती. विना परवानगी नाव, फोटो, आवाज आणि भिडू शब्द वापरणाऱ्यांवर कायदेशीर कारवाई करण्यात यावी आणि 2 कोटी 1 हजार रुपयांचा दंड ठोठावण्यात यावा, अशी मागणी त्यांनी केली आहे.
उच्च न्यायालयाने सध्या सर्व आरोपींविरुद्ध समन्स जारी केले आहेत आणि MEITY (तंत्रज्ञान विभाग आणि इलेक्ट्रॉनिक्स आणि माहिती तंत्रज्ञान मंत्रालय) यांना अशा सर्व लिंक्स काढून टाकण्याचे निर्देश दिले आहेत जिथे अभिनेत्याच्या वैयक्तिक अधिकारांचे अनधिकृतपणे उल्लंघन केले जात आहे. 15 मे रोजी न्यायालय पुढील निर्णय देऊ शकते.
जॅकीचे वकील प्रवीण आनंद यांनी न्यायालयाला सांगितले की, असे करून त्यांची प्रतिमा डागाळली जात आहे. अश्लील मीम्समध्ये त्यांच्या नावाचा गैरवापर केला जात आहे. याशिवाय त्याच्या आवाजाचाही गैरवापर होत आहे. त्यामुळे अभिनेत्याने उच्च न्यायालयात याचिका दाखल केली आहे. आणि त्यांच्या अधिकारांचे उल्लंघन थांबविण्याची मागणी केली आहे. अभिनेत्याची जॅकी श्रॉफ, जॅकी, जग्गू दादा आणि भिडू अशी वेगवेगळी नावे कोणत्याही व्यासपीठावर वापरण्यास बंदी घालण्याची मागणीही करण्यात आली आहे.