वाराणसी,दि.19: पंतप्रधान नरेंद्र मोदी यांच्या कारवर रोड शो वेळी चप्पल सारखी वस्तू फेकण्यात आल्याची घटना घडली आहे. दैनिक लोकमतने याबाबत वृत्त दिले आहे. पंतप्रधान नरेंद्र मोदी हे वाराणसी मतदारसंघातून तिसऱ्यांदा निवडून आले आहेत. मंगळवारी पंतप्रधान मोदी त्यांच्या वाराणसी मतदार संघाच्या दौऱ्यावर होते. वाराणसीत रोड शो वेळी पंतप्रधान मोदींच्या कारवर चप्पल सारखी वस्तू फेकण्याचा प्रकार घडला. याचा व्हिडीओ व्हायरल झाला आहे.
दैनिक लोकमतने दिलेल्या वृत्तानुसार पंतप्रधानांच्या रो शोवेळी रस्त्याच्या दोन्ही बाजुला गर्दी झाली होती. पंतप्रधान मोदी हे कारमधूनच सर्वांना अभिवादन करत होते. यावेळी गर्दीतून त्यांच्या बुलेटप्रूफ कारच्या काचेवर चप्पल सारखी वस्तू फेकण्यात आली.
फेकण्यात आलेली चप्पल सारखी वस्तू कारच्या बोनेटवर पडली. या घटनेचा व्हिडीओ आला आहे. मोदींच्या कारवर उभ्या असलेल्या सुरक्षा रक्षकाने हे बॉनेटवर पडलेले चप्पल सारखी वस्तू उचलून मागे फेकल्याचे या व्हिडीओत दिसत आहे. या घटनेप्रकरणी कोणाला ताब्यात घेण्यात आले की नाही हे अद्याप समजू शकलेले नाही.
