सोलापूर,दि.18: सोलापूर जिल्ह्यातील बंडगरवाडी येथे भीषण अपघातात 6 महिला ठार झाल्या आहेत. चिकमहुद (सांगोला तालुका) येथील बंडगरवाडी येथे एका आयशरने सात महिलांना धडक दिल्याने त्यातील सहा महिलांचा जागीच मृत्यू झाला आहे. तर एक महिला गंभीर जखमी झाली आहे. हा भीषण अपघात आज मंगळवारी दुपारी साडेचार वाजण्याच्या सुमारास पंढरपूर- कराड रोडवरील चिकमहुद जवळ (बंडगरवाडी) येथे घडला.
सात महिला मिळून मोलमजुरीचे काम करण्यासाठी चिकमहूद येथील शेतकऱ्यांच्या शेतावर आल्या होत्या. दुपारी काम संपल्यानंतर घरी जाण्यासाठी त्या पंढरपूर – कराड रोडवरील बंडगरवाडी येथे कडेला एसटीची वाट पाहत थांबल्या असता पंढरपूरकडून भरधाव जाणाऱ्या ट्रकने त्यांना उडविल्याने हा भीषण अपघात घडला. दरम्यान, अपघाताची माहिती मिळताच पोलीस निरीक्षक भीमराव खणदाळे, पोलीस फौजफाट्यासह घटनास्थळी दाखल झाले आहेत. ग्रामस्थांनी ट्रक चालकास पकडून पोलिसांच्या स्वाधीन केले. दरम्यान, मृत व जखमी महिला कटफळ (ता. सांगोला) येथील रहिवासी आहेत.
वाहन चालक हा नशेत होता का याबाबत ही पोलिसांकडून तपास केला जात आहे. या घटनेमुळे गावावर शोककळा पसरली आहे. वाहनाची धडक इतकी जोरात बसली की महिलांचा जागीच मृत्यू झाला.
